Isa 17 | MEU | STEP | Maduna metauna Damasko latanai: A itaia, Damasko hanuana baine vahu, nadi hesenudia ai bainela.

Isaiah 17

Maduna metauna Damasko latanai

1 Maduna metauna Damasko latanai:

A itaia, Damasko hanuana baine vahu,
nadi hesenudia ai bainela.
2 Hanuadia bae mia ḡaḡae ela bona hanaihanai,
mamoe seridia edia gabu ai baela;
mamoe na unuseni ai bae hekure,
bona tau ta ese basine hagaridia.
3 Efraim kohorona baine puki oho,
bona Damasko basileiana danu;
Suria taudia kwabukwabudia danu bae boio,
Israel taudia hairaidia vada e boio heḡereḡerena.
Iehova Sabaota unu e gwau tomamu.

Israel ihahemaoro-henina

4 Una dina ai, Iakob hairaina na baine maraḡi,
bona tau-anina baine varoda-varoda;
5 uit iutuna tauna ese e ginimu uitina e habouamu
bena ia imana ese uit anidia e utumu na heto,
eiava uit anidia momorudia
Refaim kourana ai e gogomu na heto.
6 Momorudia do bae mia,
olive auna e kwadiamu negana ai na heto;
huahua rua eiava toi
atai rigina dorina ai e miamu
eiava hani eiava ima
huahua auna rigina ai e miamu na heto.
Iehova, Israel Diravana, unu e gwau tomamu.

7 Una dina ai taunimanima ese Ikaradia Diravana na bae laloa, bona matadia ese Israel ena Helaḡa Diravana bae haḡerea; 8 ihaboulaina patadia, imadia amo e kara ḡaudia, na basie lalodia; bona ima-kwakikwakidia amoe kara ḡaudia, Asera ena au-tubua helaḡadia eiava muramura mai bonadiapatadia, na basie haḡeredia.

9 Una dina ai edia goada hanuadia na Hivi taudia bona Amoro taudia edia hanua ahutudia, Israel taudia daidiai e rakatanidia gabudia, heḡereḡeredia ai baela, bona tano na baine vahu.

10 Badina be ihamaurimu Diravana vada o laloa boio,
bona ihahemetaimu Nadi-ginina so laloa taomu;
taunabunai, ena be herahera namodia
bona dirava idauna ena uhe helaḡadia ba hado,
11 ena be ba hado dinana ai ba hatubudia
bona ba hado dabana ai anidia ba havaradia,
to anidia na bae puki,
lalo-hisihisi bona asi ihanamona hisina dinana ai.

12 Aha! Taunimanima hutuma reḡedia,
davara hurehuredia gurudia na heheto.
Aha! Basileia idau-idau reḡedia,
e heloḡo-heloḡomu, ranu badadia gurudia na heheto.
13 Basileia idau-idau taudia na e heloḡo-heloḡomu,
ranu momo gurudia na heheto,
a ia ese baine gwau henidia,
bena dauha bae heau lao;
lai ese momoru na ororo ai e hoda ohomu na heto,
eiava lai-gubana ese ḡahu e hodaia isimu na heto.
14 A itaia, adorahi ai gari bada-herea!
Daba do se reremu, idia na lasihidia!
Ina na eda ḡau e abi ohomu taudia ahudia;
ina na eda kohu e dadi ohomu taudia davadia.